«Ыллыыр Горнай ыччата»

Бэс ыйын 16 күнүгэр Бэрдьигэстээх нэһилиэгин Үрүҥ Тунах Ыһыаҕын чэрчитинэн «Ыллыыр Горнай ыччата» эдэр ыччакка аналлаах ырыа күрэҕэ буолан ааспыта. Бу күрэҕи Сэмэн уонна Соппуруон Даниловтар ааттарынан Духуобунас киинэ уонна Мэхээлэ Дьөгүөрэп аатынан Сынньалаҥ киинэ тэрийэн ыыппыттара.

Ырыа аргыстаах түһүлгэбитигэр уопсайа аҕыс эдэр ыччат кыттыыны ылбыта. Дьүллүүр сүбэнэн көмүс куолас Нина Ивановна Максимова, Духуобунас киинин директора Клавдия Георгиевна Сергеева, ыччат политикатын специалиһа Сардаана Иннокентьевна Туралысова үлэлээбиттэрэ.

Кыттааччылар бары да чаҕылхайдар, көмүс куоластаахтар этэ. Түмүккэ бастакы степеннээх лауреатынан буолбута Иван Дьяконов «Аҕам алааһа» репертуарынан, иккис степеннээх лауреат аатын ылбыта Руслан Семенов, үһүс степеннээх лауреат Кыыдаана Ефремова буолан кыайыы кынаттанан өрөгөйдөммүттэрэ. Онтон бастакы степеннээх дипломант аатын Альберт Петров, иккис степеннээх дипломант Варвара Мухоплева, үһүс степеннээх дипломант Наталья Жиркова кыайыылаахтарынан буолбуттара. Икки биһирэбил бирииһи Акулина Филиппова уонна Варвара Пестерева ылбыттара. Кыттааччылар бары хайҕал суругунан, бириистэринэн наҕараадаламмыттара. Көрөөччүлэр дуоһуйа сынньанан, ырыа истэн санаалара көтөҕүллэн барбыттара буолуо диэн бигэ эрэллээхпит.