Арассыыйа судаарыстыбаннай былааҕын күнүн Бэрдьигэстээх олохтоохторо, ыалдьыттара Кыайыы болуоссатыгар бэлиэтээтилэр. Дойду былааҕын баһылык солбуйааччыта  Владимир Владимирович Спиридонов уонна А.Н. Осипов аатынан орто оскуола бастыҥ 11 кылааһын үөрэнээччитэ Сулаймонова Нурчалпон, судаарыстыба өрөгөй ырыатыгар доҕуһуоллатан көтөхтүлэр

Бу үөрүүлээх күн 14 саастарын туолбут оҕолорго: Артем Осиповка, Альберт Саввиҥҥа, Мичил Семеновка, Сайыына Федороваҕа Арассыыйа гражданинын пааспарын Горнай улууһун ИДьМ миграционнай пуун начаалынньыга Андрей Дмитриевич Филиппов туттарда. Түмүккэ олохтоохтор Арассыыйа былааҕын тутан #мойфлаг флешмобка кытыннылар.

1991 сыл атырдьах ыйын 22 күнүгэр Арассыыйа дьокутааттара саҥа Арассыыйа былааҕынан нуучча судаарыстыбатыгар үс үйэ устата аргыс буолбут үс өҥнөөх былааҕы билиммиттэрэ.

Бэрэсидьиэн Борис Ельцин 1994 с. атырдьах ыйын 20 күнүгэр таһаарбыт ыйааҕынан, атырдьах ыйын 22 күнэ Арассыыйа Федерациятын Судаарыстыбаннай былааҕын күнэ олохтоммута. Былаах үс өҥнөөҕүн иһин нууччалыы «триколор» диэн ааттыыллар. Үрүҥ – эйэни, эҥкилэ суох ыраас сыһыаны, халлаан күөҕэ — эрэли, бэриниилээх буолууну, кыһыл – Аҕа дойду туһугар тохтор хааны бэлиэтиир.